Screenshot fra Shadow Man Remastered

Tre på gassen

Shadow Man Remastered (Windows, PS4, XB1, Switch)

Som mariokartomantikk-innføringa i min førre artikkel er inne på, virkar det nærliggjande å lese røyrleggjaryrket til Super Mario-brørne som ein metafor for sjamanisme: Røyrleggjaren er eit medium som kan dette med røyr – talerøyr eller tette røyr eller lekkjande røyr av all slags typar – og dermed kan kople åndeverda og den fysiske verda saman. Lik ein sjaman. I Shadow Man Remastered spelar du rolla som Shadow Man, ein voodoo-sjaman-vri på superhelt-troper som meklar – med makt – mellom «liveside» (jorda) og «deadside» (helsike). 

Denne framifrå oppdaterte og nyoppussa versjonen av den undervurderte kultklassikaren frå 1999 kom ut til PC i fjor og konsollar tidligare i år. Det er tale om ein banebrytande og unik metroidvania i 3D, eit nærast fullkome stykkje spelkunst med god, bekmørk stemning som fortener å bli spelt – av deg, og du fortener å spele Shadow Man Remastered. Musikken, signert Tim Haywood, er òg noko for seg sjølv, i grenselandet mellom ambient, industrial og det beint fram atonale, snåle og forstyrrande.

Screenshot fra Stanley Parable: Ultra Deluxe

Stanley Parable: Ultra Deluxe (Windows, Linux, Mac, Xbox, PS, Switch)

I desse skat(t)emessige tider er det vel mange som tenkjer på skatten, og nylig kom Turnip Boy Commits Tax Evasion ut på Xbox Game Pass. Her unngår du skatt og kjempar mot ein korrupt grønsaksstat, og opp frå kontorstolen og ut frå kontoret kan du òg kome deg i Stanley Parable: Ultra Deluxe, den nye versjonen av det klassiske ludonarrative eksperimentet Stanley Parable, først utgjeve som Half-Life 2-mod 2011, så laga på nytt i 2013, så kom ein demo-versjon som er eit verk i seg sjølv, og no er altså denne splitter nye Ultra Deluxe-utgåva tilgjengeleg til glede for nye og gamle spelarar.  Det er vanskeleg å seie noko særleg om The Stanley Parable utan å risikere å spolere opplevinga, som er proppfull av medvitsendrande vandringar gjennom umogelege korridorar, absurde twists, snåle historiesvingingar (gamle og nye), og ei uutgrunneleg djupne som transcenderer tid og rom – ikkje ulikt Mario Kart 8 Deluxe – Booster Course Pack. Og det er rasande festleg dertil, komikk frå høgste hylle.

Remute – R64 (Bandcamp)

Den ahistoriske innføringsteksten om overlappen mellom det okkulte og Mario Kart ved sidan av kjem inn på emnet Nintendo 64, og nylig gav den hamburgske technoprodusenten Remute ut det som blir kalla det første musikkalbumet til den gamle spelkonsollen frå 1996. Albumet R64 er tilgjengeleg på Remutes Bandcamp, i Nintendo 64-kassettformat så vel som både det eine og andre filformatet. Musikken fins òg på streamingtenester.

For samlaren er Remutes for lengst utselde album for Super Nintendo, Cult Of Remute, og Mega Drive, Technoptimistic, tilgjengeleg i nytt opplag frå utgjevaren Strictly Limited. Det er faktisk ikkje berre gimmick – Remute lagar god musikk, spretten, blytung, dansbar, hørbar, nostalgisk og fresh.

X